Wonderklip: Feeskonsert ontvang staande ovasie!

Massakoor2

Vanjaar vier die Hoërskool Bellville sy 80ste bestaansjaar. As deel van die feesvieringe het die Hoërskool Bellville `n feeskonsert op die planke gebring. Die konsert het op 4 en 5 Augustus in die Hugo Lambrechts-ouditorium in Parow plaasgevind.

Díe konsert het met spesiale solo-opvoerings van oud- en huidige leerders begin: David Bester (viool), Annerike du Plessis (klavier) en Madre Smit (solis).

madre sopraan

David Bester

Annerike du Plessis

Die konsert, “Wonderklip”, is deur die huidige hoof, mnr. G du Plessis, geskryf en beeld die Hoërskool Bellville se ryk geskiedenis en verbintenis met die stad Bellville uit.  Die bekende musiek van “Vangelis” is as agtergrond vir die vertelling van die stuk gebruik.

Die musiek is gebaseer op werke van die Griekse komponis, Evangelos Odysseas Papathanassiou, beter bekend as Vangelis, en sluit die 7de en 10de bewegings van die Mythodea Koraalsimfonie en die gewilde Conquest of Paradise in. Laasgenoemde was die klankbaan van die rolprent “1492” ter viering van die 500ste herdenkingsjaar van Christopher Columbus se ontdekking van die Amerikas.  Mythodea is ter viering van NASA se Odyssey-ruimtetuig komponeer toe dié die wentelbaan van Mars in 2001 binnegegaan het. Pryswenner komponiste, Arthur Feder en Antoni Schonken, het hierdie werk vir solis, koor en simfoniese blaasorkes verwerk. Dit is verder aangepas om vertellers en dansers in te sluit om so die verhaal van Hoërskool Bellville se geskiendenis en sy toekoms te vertel.

Die geskiedenis van Hoërskool Bellville wat vanjaar die 80-mylpaal behaal, is fyn verweef met die geskiedenis van die groter Bellville.  Met hierdie klank- en musiekspel, “Wonderklip”, word dit in die Vangelis Celebration verbeeld.

Die area wat vandag bekend staan as Bellville, was aanvanklik gebruik as ‘n halfweghuis vir boere wat hulle produkte in Kaapstad kom verkoop het. Dit het aan die begin bekend gestaan as die Hardekraaltjie of 12-myl-klip in Maitlandweg.  Hierdie halte of klipstaanplek is in hierdie produksie die sentrale as waarom alles draai.

Massakoor

Op 18 November 1861 is hierdie halfweghuis hernoem na Bellville, ter ere van die landmeter-generaal, Charles Bell. Die treinspoor van Kaapstad het Bellville op 13 Februarie 1862 bereik en in 1866 is die pad na die 12-myl-klip verander na Durbanweg. Hierdie magiese kragte van die 12-myl-klip word uitgebeeld deur te kyk na die ryk geskiedenis van die Kaapkolonie.

In die eerste gedeelte word gebruik gemaak van pragtige verhale van die son en die maan deur die Khoi-Khoi en die rotstekeninge van die San. Die WONDERKLIP lewe soos ‘n volmaan en soos die witvrou van die Brandberg verdryf die WONDERKLIP die slegte.

In die tweede gedeelte word gefokus op die eerste Setlaars en Vryburgers se vestiging aan die Kaap. Die WONDERKLIP sprei sy vlerke en word al groter en sterker.

In die derde gedeelte word gefokus op die konflik in die Kaapkolonie, maar ook die vestiging van sendelinge en soos die Morawiese dissipels van Genadendal gee die WONDERKLIP om vir die mensdom.

Massakoor3

Deur gebruik te maak van ‘n ou Suid-Afrikaanse sprokie (Van Donck en Tafelberg se kleed) wprd die magiese 12-myl-klip in hierdie produksie verbind met die beginsels en waardes van die skool: Diensbaarheid (Luiperd), Menswaardigheid (Buffel), Uitnemendheid (Renoster) en Integriteit (Olifant). Die Hoërskool Bellville se visie is dan ook Paratus ad Omnia (Gereed vir alles) soos voorgestel deur die Leeu.

Hoërskool Bellville se eie Blaasorkes (onder leiding van mnr. Riaan van Wyk) en die Hoërskool Bellville se gemengde koor (onder leiding van me. Hannelize du Plessis) het die aand gesorg vir musiek van uitstaande gehalte.  Oudleerder, Madré Smit, het die sologedeelte van die “Wonderklip” gesing.

Die produksiespan wat baie hard gewerk het, was:

Konsep en storielyn: Riaan van Wyk, Deon du Plessis en Hannelize du Plessis

Musiekregie: Riaan van Wyk

Regie: Deon du Plessis en Helen van Lill

Klank en beligitng: Stefan Kruger en Audiomission

Kostuums: Zonika Wasserman

Rekwisiete en visuele effekte: Stefan Kruger, Ruan Maree en Zonika Wasserman

Choreografie: Tilana Kruger

Orkesorganiseerder: Marlese den Haan

Koororganiseerder: Stefan Kruger en Zonika Wasserman

Verhoogbestuur: Zonika Wasserman, Elizabeth vd Merwe, Suzette Vermeulen, Cecile Badenhorst, Herman Engelbrecht en Sarel Olckers

Fotografie: Taryn Howard

 

Elke uitvoering het met `n massakoor geëindig, en die staande ovasies vir al drie uitvoerings het bevestig dat dit ‘n uitvoering uit die boonste rakke was.

Die Hoërskool Bellville is besonder trots op elke leerder wat deel was van hierdie pragstuk en sien uit na die volgende 80 jaar!